СУРГАЛТЫН ГЭРЭЭ
Нэг. Гэрээний зорилго
1.1 Нэг тaлаас “АНГЛИ ХЭЛНИЙ АКАДЕМИ” /цаашид “Академи”, нөгөө талаас тус Академид суралцах хүсэлтэй “Суралцагч” гэх)-ийн хууль ёсны асран халамжлагч, харгалзан дэмжигч “Суралцагч Тал” гэх) нар академик 60 цагийн (60 тэнхимийн + 30 цагийн гэрт бие даалт) сургалтад хамрагдахаар харилцан тохиролцож, энэхүү гэрээг хэлэлцэн тохиролцож, харилцан зөвшөөрснөөр дор дурдсан нөхцөлөөр байгуулав.
1.2. Энэхүү гэрээний зорилго нь мэргэжлийн багшлах бүрэлдэхүүнтэй, заах арга зүй, сургалтын орчинг бүрдүүлсэн, шалгалт авч, Суралцагчийн түвшинг тодорхойлж, Суралцагчийг академик сургалтад бүрэн хамруулж, амжилттай суралцаж сертификат авах, Суралцагчид англи хэлний суурь мэдлэг олгохтой холбоотой харилцааг Монгол Улсын Иргэний хууль, Монгол Улсын Боловсролын тухай хууль, Англи хэлний академийн дотоод дүрэм, журмыг үндэслэсэн харилцааг зохицуулахад оршино.
Хоёр. Англи хэлний академийн эрх, үүрэг
2.1 Англи хэлний сургалтыг батлагдсан стандарт хөтөлбөр, сургалтын төлөвлөгөө, сургалтын график хуваарийн дагуу, мэргэжлийн түвшинд үйл ажиллагаагаа явуулна;
2.2 Академик нэг цагийн хичээлийн үргэлжлэх хугацаа нь хичээлийн академик нэг цаг буюу 40 минутаар тооцогдоно;
2.3 Суралцахад шаардлага хангасан хичээлийн танхим, сургалтын хэрэглэгдэхүүнээр Суралцагчийг хангах;
2.4 Суралцагчдын сургалтын явцад хяналт тавих, түүнд зохих туслалцааг үзүүлэх;
2.5 Суралцагч талаас гаргасан сургалтын чанар, агуулга, сургагч багшийн ур чадвар болон бусад сургалттай холбоотой асуудлаар гаргасан санал хүсэлт, гомдлыг шийдвэрлэх;
2.6 Суралцагчийн хүмүүжил, сахилга батаас шалтгаалсан аливаа асуудал, маргаанд Академи хариуцлага хүлээхгүй;
2.7 Багшийн өгсөн даалгавар, давталтыг гурав болон түүнээс дээш удаа хийгээгүй, хуваарийн дагуу сургалтдаа тав болон түүнээс дээш удаа хоцрох, гурав болон түүнээс дээш удаа албан ёсны чөлөө аваагүйгээр тасалсан бол сануулга мэдэгдлийг бичгээр Суралцагч талд өгөх;
2.8 Бичгээр сануулга хүлээн авснаас хойш 2.7.-р зүйлд заасан зөрчил дахин давтагдвал сургалтын гэрээг цуцлах бөгөөд сургалтын төлбөрийг буцаан олгохгүй.
Гурав. Суралцагч талын эрх үүрэг
3.1 Суралцагч нь дараах эрх, үүрэгтэй. Үүнд:
3.1.1 Батлагдсан сургалтын төлөвлөгөөний агуулга, стандартыг бүрэн эзэмшиж, багшийн тавьж буй зүй ёсны шаардлагыг биелүүлж, амжилттай суралцах;
3.1.2 Суралцагч нь сургалтдаа хөтөлбөрийн дагуу бүрэн хамрагдсаны дараа Академиас бэлтгэсэн шалгалтыг өгснөөр сертификат авах эрх үүсэх бөгөөд суралцагч төгсөлтийн шалгалтад ороогүй тохиолдолд сертификат олгохгүй.
3.1.3 Академийн дүрэм, дотоод журмыг дагаж өрдөх;
3.2 Суралцагч тал нь дараах эрх, үүрэгтэй. Үүнд:
3.2.1 Сургалтын чанар, агуулга, сургагч багшийн ур чадвар болон чадвар сургалттай холбоотой асуудлаар санал хүсэлтээ бичгээр холбогдох дээд албан тушаалтанд гаргах;
3.2.2 Суралцагчийн мэдлэг, чадвар, дадал, ахицын талаар мэдээллийг Сургагч багшаас авах, байнгын харилцаа холбоотой байж хамтран ажиллах;
3.2.3 Суралцагчийг гэрийн даалгавраа хийх нөхцөл бололцоо, техник хэрэгсэл /компьютер, интернэт, ухаалаг гар утас/ -ээр хангах;
3.2.4 Суралцагчид өдөр бүр багшийн өгсөн даалгаврыг хийх 20 минутыг тогтмол цагт хийж, англи хэл амархан сурах дадлыг төлөвшүүлэхэд нь дэмжлэг үзүүлж, хяналт тавина.
3.2.5 Сургалтын хуваарийн дагуу суралцагчийг сургалтад яг цагт нь хамруулах;
3.2.6 Суралцагчийг сургалт эхлэх цагт авч ирж, дуусах цагт нь авах үүрэгтэй ба сургалтын цагаас бусад хугацаанд гарсан аливаа асуудлыг Англи Хэлний Академи хариуцахгүй;
3.2.7 Академиас зохион байгуулах эцэг эхчүүдэд зориулсан нээлттэй хичээл болон бусад арга хэмжээнд заавал идэвхтэй хамрагдах;
Дөрөв. Гэрээ цуцлах нөхцөл, төлбөрийн суутгал
4.1. Сургалтын төлбөр буцаан олгох тухай:
4.1.1. Сургалтад бүртгүүлж төлбөрөө төлсөн боловч аливаа шалтгаанаар сургалт эхлэхээс өмнө болон сургалт эхэлснээс хойш хичээлийн хоёр өдрийн дотор суралцагч өөрийн хүсэлтээр гэрээг цуцлах тохиолдолд сургалтын нийт төлбөрийн 10 хувийг суутгана. Гэрээ байгуулсан сурагчдын тооноос анги түүнд ногдох тогтмол үйл ажиллагааны нөхөх боломжгүй тул энэхүү хугацаанаас хойш гэрээ цуцалбал сургалтын төлбөр буцаан олгогдохгүй.
4.1.2. Суралцагч нь хүндэтгэх шалтгаанаар буюу гадаад улсад сургалтад хамрагдах болон эрүүл мэндийн улмаас цаашид сургалтад үргэлжлүүлэн сурах боломжгүй болсон тохиолдолд баталгаажуулсан албан бичиг /сургуулийн урилга, элчингээс олгосон виз, эмнэлгийн албан ёсны бичиг г.м хууль ёсны эрх бүхий байгууллагын албан бичгийг үндэслэн/-ийг авч ирж, Салбарын захиралтай өөрийн биеэр ирж уулзах, хууль ёсны төлөөлөгчөөр дамжуулан бичгээр мэдэгдсэн бол мэдэгдсэн өдрөөр тасалбар болгон сургалтад хамрагдсан нэг өдрийн хичээлийн төлбөрийг 1,7 дахин /нэг аравны долоо дахин/ тооцон суутгаж, үлдэгдэл төлбөрийг ажлын 5 хоногийн дотор холбогдох дансанд шилжүүлнэ.
4.2. Сургалтаас түр хугацаанд чөлөө олгох, сургалтыг хойшлуулах тухай:
4.2.1 Суралцагч нь төлбөрөө бүрэн төлсөн хэдий дээрхээс бусад аливаа шалтгаанаар сургалт эхлэхээс өмнө нэг удаа 10 хүртэлх сарын хугацаагаар түтгэлзүүлж болно. Энэ тохиолдолд албан ёсоор Салбарын захиралд бичгээр хүсэлтээ гаргана.
4.2.2. Суралцагч нь сургалтыг дахин хойшлуулах эрхгүй бөгөөд үргэлжлүүлэн суралцах боломжгүй тохиолдолд үлдэгдэл төлбөр буцаан олгогдохгүй сургалтын гэрээг Академийн санаачилгаар бүрэн дуусгавар болно.
Тав. Давагдашгүй хүчин зүйл
5.1. Гэнэтийн буюу давагдашгүй хүчний шинжтэй онцгой нөхцөл байдал, эсхүл талуудын эрх, хууль ёсны ашиг сонирхлыг хамгаалах үүднээс гэрээний хугацааг үргэлжлүүлэх, сунгахыг шаардах боломжгүй нөхцөл байдлыг хүндэтгэн үзэх үндэслэл гэж үзнэ.
5.2. Гэнэтийн нөхцөл байдал гэдэгт дэлхий нийтийг хамарсан аливаа халдварт өвчин тархах, байгууллагын үйл ажиллагааг төрийн эрх бүхий байгууллагын шийдвэрээр түр хугацаагаар зогсоох зэргийг ойлгоно.
5.3. Давагдашгүй хүчин зүйл гэдэг нь үерт автах, гал түймэрт нэрвэгдэх, дэлбэрэлтэд өртөх, газар хөдлөх, тахал болон бусад байгалийн хүчин зүйлс мөн цэрэг, дайны үйл ажиллагаа, төрийн эрх барих байгууллагын шийдвэр хориг, ажил хаялт зэрэг Талуудын хүсэл зоригоос үл хамаарах, Гэрээгээр хүлээсэн үүргээ бүхэлд нь буюу хэсэгчлэн биелүүлэх боломжгүй нөхцөл байдал бий болохыг ойлгоно.
5.4. Давагдашгүй хүчин зүйлийн нөлөөнд өртсөн тал нь нөгөө талдаа нэн дариу мэдэгдэх бөгөөд
тухайн хүчин зүйлийн нөлөөнд өртөөгүй өөрийн үүрэгт хамаарах үйл ажиллагааг үргэлжлүүлэн
гүйцэтгэж, Гэрээний хэрэгжилтэд гарсан саатлыг аль болох богино хугацаанд арилгах, үйл
ажиллагааг сэргээх талаар шаардлагатай бүхий л арга хэмжээг хамтран авч ажиллана.
5.5. Давагдашгүй хүчин зүйлийн улмаас Гэрээний хэрэгжилт нэгээс /1/ дээш сар ба түүнээс дээш
хугацаагаар бүхэлд нь буюу хэсэгчлэн саатсан тохиолдолд аль нэг тал нь нөгөө талдаа хандан
Гэрээг дуусгавар болгох тухай хүсэлтээ бичгээр мэдэгдэж, гэрээний гүйцэтгээгүй байгаа үүргийг
тэнцүү хуваарилан харилцан тохиролцож шийдвэрлэнэ.
Зургаа. Талуудын хариуцлага
6.1. Суралцагч тал төлбөрийг гэрээгээр тогтоосон хугацаанд төлөөгүй бол хэтэрсэн хоног тутамд төлөгдөөгүй байгаа үнийн дүнгийн 0,5 хувиар алданги тооцно.
6.2. Академи нь сургалтын хөтөлбөрийн дагуу хичээлийг ороогүй бол сургалтыг нөхөн орно. Академийн багшийн үйл ажиллагаанаас хамаарч хүндэтгэн үзэх шалтгаантайгаар тухайн өдрийн хичээл орох боломжгүй бол дахин орох бөгөөд дахин орсонтой холбоотой зардлыг Академи бүрэн хариуцна.
6.3. Энэхүү гэрээний 5 дугаар зүйлд заасан Гэнэтийн болон давагдашгүй хүчний шинжтэй нөхцөл байдал бий болж, Суралцагч болон Академийн хичээл тэнхимээр орох боломжгүй цахим хэлбэрт шилжихэд хүрэхэд тэнхимээр ордог цагийн хуваарийн дагуу хичээллэх тул тухайн Суралцагч төлбөрийн үүргээс чөлөөлөгдөхгүй болно.
Долоо. Бусад заалт
7.1. Энэхүү гэрээ нь талууд гарын үсэг зурсан үеэс эхлэн хүчин төгөлдөр болно.
7.2. Гэрээг 2 хувь байгуулах бөгөөд талууд тус бүр нэг хувийг хадгална.
7.3. Хэрэв талуудын хооронд маргаан гарвал харилцан зөвшилцөж эвийн замаар шийдвэрлэх
7.4. Суралцагч өөрийн эрх ашгаа хамгаалах заалтыг уг гэрээнд нэмэлтээр оруулах эрхтэй бөгөөд
суралцагч ямар нэг нэмэлт заалт оруулах хүсэлт гаргаагүй бол гэрээтэй холбогдон үүсэх бүх
асуудлыг уг гэрээнд зааснаар зохицуулна.